ကျွန်တော်လည်း အလုပ်တွေများနေတာနဲ့ ဘလော့ဖက် မလှည့်ဖြစ်တာ တော်တော်ကြာနေပါပြီ။ ခုတော့ အမြင်မတော်တာလေး တစ်ခုတွေ့လို့ ရေးရပါဦးမယ်။ တစ်နေ့က ကျွန်တော် လှူထားတဲ့ ဇရပ်အတွက် ဆေးသုတ်ဖို့ ဆေးသွားဝယ်ပါတယ်။ အဲဒီလိုဆေးသွားဝယ်ရင်း အိမ်သုတ်ဆေးဆိုင်နားက လက်ဖက်ရည်ဆိုင်မှာ ထိုင်ဖြစ်ပါတယ်။
အဲဒီလိုထိုင်နေရင် အသက်ရှစ်ဆယ်လောက် ရှိမယ့် အဖိုးကြီး တစ်ယောက် လက်ဖက်ရည်ဆိုင်ရှေ့မှာ ထိုင်ချလိုက်တာ တွေ့ရပါတယ်။ နေကလည်း အတော်ပြင်းနေတဲ့ အချိန်ပါ။ ကျွန်တော်လည်း အဘ ဘာများဖြစ်လို့လဲပေါ့။ ထိုင်ချပြီး မကြာပါဘူး။ အန်ပါတော့တယ်။ အန်တာမှ စားထားသမျှ အကုန်ပဲ။ အဲဒါနဲ့ စားပွဲထိုးတွေရယ် ဆိုင်ရှင်ရယ် ကျွန်တော်ရယ် အဘကို ဆိုင်ထဲ့ ဆွဲသွင်းကြပါတယ်။ ဦးထုတ်တစ်လုံး၊ တုတ်ကောက် တစ်ချောင်းပဲ ပါပါတယ်။ ဆိုင်ထဲလည်း ရောက်ရော ထိုင်ခုံပေါ်မှာတောင် မထိုင်နိုင်တော့ပါဘူး။ ဒီအတိုင်း ကြမ်းပြင်မှာ ထိုင်နေရပါတယ်။ အဲဒီလိုထိုင်နေရင်း ဆိုင်ရှင်ကလည်း ယက်ခတ်ပေးနေပါတယ်။ အဘကြည့်ရတာ အခြေအနေမဟန်တော့ပါဘူး။
ဒီတော့ ကျွန်တော်လည်း ဆိုင်ရှင်ကို ပြောရပါတယ်။ အဘကြည့်ရတာ အခြေအနေမဟန်ဘူးပေါ့။ ဆေးခန်းဖြစ်ဖြစ်၊ ဆေးရုံဖြစ်ဖြစ် ပို့မှ ဖြစ်တော့မယ်ပေါ့။ ဒီတော့ ဆိုင်ရှင်က ဒီအဘကို သူသိတဲ့အကြောင်း ဟိုဖက် တစ်ဆိုင်ကျော်က သူ့ညီရဲ့ဆိုင်ဖြစ်တဲ့ အကြောင်း ဒီနားတစ်ဝိုက်မှာလည်း အဘအမျိုးတွေရှိကြောင်း၊ သူလည်း အကြောင်းကြား ထားတဲ့အကြောင်း ပြောပါတယ်။
ကျွန်တော်လည်း ဆက်ပြီးမေးကြည့်တော့ အဘက အခု သူ့သမီးတစ်ယောက်နေတဲ့ လှိုင်သာယာမှာ လိုက်နေတာဖြစ်ကြောင်း၊ ဒီကိုလာလာပြီး လက်ဖက်ရည် သောက်တတ်ကြောင်း သိရပြန်ပါတယ်။ ကျွန်တော်လည်း သူ့အမျိုးတွေများ လာမလားဆိုပြီး ထိုင်စောင့်နေပါတယ်။ အဘကြည့်ရတာတော့ သတိမရတော့ပါဘူး။ ဆယ့်ငါးမိနစ်လောက် ကြာတော့လည်း မလား၊ နာရီဝက်ကြာတော့လည်း တစ်ယောက်မှ မလာကြပါဘူး။ အဘကိုတော့ စားပွဲထိုးလေးက ယက်ခတ်ပေးနေပါတယ်။ ကျွန်တော်လည်း ကူညီသင့်တာရှိရင် ကူညီရအောင် ထိုင်စောင့်နေပါတယ်။
ကြာလာတော့ ကျွန်တော်လည်း စိတ်မရှည်တော့ပါဘူး။ ဆိုင်ရှင်ကို ကျွန်တော်တို့ ကူညီလိုက်လို့ မဖြစ်ဘူးလားဆိုတော့။ ကျွန်တော်တို့ ကူညီလိုက်မယ်ဆိုရင် နာရေးအထိပါ ကူညီရမှာဗျ။ သူ့အမျိုးတွေ အကြောင်း ကျွန်တော်သိတယ်တဲ့။ ဆိုင်က စားပွဲထိုးလေးကို သူ့သမီးဆီကို လွတ်ထားတယ်တဲ့။ မရရအောင် ခေါ်ခဲ့ဖို့လည်း မှာထားတယ်တဲ့။
ကျွန်တော်စိတ်ထဲမှာ တော်တော် မကောင်းဖြစ်သွားပါတယ်။ အဘလည်း အိုဇာတာ မကောင်းလိုက်တာပေါ့။ တကယ်ဆို တစ်ယောက်လောက်တော့ ရောက်အောင်လာပြီး ဆေးရုံပို့ဖို့ စီစဉ်သင့်တယ်ဆိုပြီး တွေးနေမိပါတယ်။ ကိုယ်ကူညီလိုက်မယ် ဆိုပြန်ရင်လည်း နာရေးအထိပါ ကူညီရမယ်ဆိုတဲ့ ဆိုင်ရှင်ပြောတဲ့ အခြေအနေကို သိနေပြန်တော့ ဘယ်လိုလုပ်ပေးရမှန်း မသိတော့ပါဘူး။
ဒီလောက် အသက်အရွယ်ရောက်နေတဲ့ လူတစ်ယောက်ကို ကူညီစောင့်ရှောက်ဖို့ ဘယ်လောက်ပင်ပန်းလို့လဲဗျာ။ သားသမီး ကျောထောက်နောက်ခံ မရှိတာလည်း မဟုတ်၊ ပိုက်ဆံ မရှိကြတာလည်း မဟုတ်။ တော်တော် နေနိုင်ကြတာကိုလည်း အံ့သြမိပါတယ်။ အဘဖက်က ကြည့်ပြန်တော့လည်း ဘယ်လို အကုသိုလ်ကံက ကူညီမယ့်သူ မရှိအောင် တားဆီးနေမှန်းမသိ။ အဘရဲ့ အမျိုးတွေဖက်က ကြည့်ပြန်တော့လဲ အကုသိုလ်ကံတွေ ယူနေကြပါလားဆိုပြီး စိတ်မကောင်း တော်တော်ဖြစ်ရပါတယ်။
ဒီလိုတွေးနေရင်း တစ်လောက ဆုံးသွားတဲ့ အဖွားကို သတိရပါတယ်။ အဖွားကတော့ အိုဇာတာ ကောင်းတယ်လို့ ဆိုရပါမယ်။ အိုတဲ့အချိန်မှာ သားသမီးတွေ၊ မြေးတွေကအစ အဖွားကို ဂရုစိုက်ကြပါတယ်။
အော် ဘဝတွေများ တယ်ကြောက်စရာ ကောင်းပါလားဗျာ။ ပြုသူအသစ် ဖြစ်သူအဟောင်းဆိုသလို အဘကတော့ ဖြစ်သူအဟောင်းထဲမှာပါနေပါတယ်။ အဘရေ ဒီဘဝမှာပဲ အဘရဲ့ ဒုက္ခတွေ ကုန်ပါစေဗျာလို့ ဆုတောင်းရုံမှတစ်ပါး ဘာမှမတတ်နိုင်တော့ပါ။
